خواجہ آصف : نواز شریف ہر سوال کا جواب دینے کیلئے تیار ہے لیکن زکوۃ کے پیسوں کا حساب کون دے گا؟

خواجہ آصف : نواز شریف ہر سوال کا جواب دینے کیلئے تیار ہے لیکن زکوۃ کے پیسوں کا حساب کون دے گا؟

اسلام آباد (مانیٹرنگ ڈیسک )  وزیردفاع خواجہ آصف کا کہنا ہے کہ احتساب مسلم لیگ (ن) کا بنیادی ستون ہے اور نوازشریف ہرسوال کا جواب دینے کو تیار ہیں لیکن زکوۃ کے پیسوں کا حساب کون دے گا۔

اسلام آباد میں میڈیا سے بات کرتے ہوئے وزیر دفاع خواجہ محمد آصف کا کہنا تھا کہ جس دن سے پاناما لیکس کا معاملہ بحث بنا وزیراعظم نوازشریف نے ابتدائی دنوں میں ہی خود کواحتساب کے لئے پیش کردیا تھا، سپریم کورٹ کو بھی جوڈیشل کمیشن بنانے کے لئے تحریر بھیجی ،پارلیمنٹ میں گئے اور آج بھی پاکستان کی سب سے بڑی عدالت کے سامنے اپنے قائد کی جگہ ہم موجود ہیں، نوازشریف ہر سوال کا جواب دینے کے لئے تیار ہیں کیوں کہ مسلم لیگ (ن) کا بنیادی ستون احتساب ہے۔

خواجہ آصف کا کہنا تھا کہ زکوۃ کے پیسے کھانے والے بھی تو اپنا احتساب دیں۔ وفاقی وزیر نے کہا کہ 2012 سے پوچھ رہا ہوں کہ خیرات اور زکوۃ کے پیسے کہاں گئے عمران خان نے 3600 گھربنانے کا وعدہ کیا تھا وہ ایک گھر بھی دکھا دیں کہاں بنایا ہے، سیلاب زدگان کے گھر کون بنائے گا سیلاب زدگان کے نام پر خیرات اور زکوۃ کے پیسوں اور شوکت خانم اسپتال کے 70 لاکھ ڈالرز  کا حساب کیوں نہیں دیا جارہا ہے۔